علق الكابتن طاهر أبو زيد يوجه رسالة نارية لحسام حسن انت واضح إنك ما اتعلمتش حاجة من مدرسة حسن شحاتة لأنه لما يبقى عندك مهاجم تقيل زي مصطفى محمد وتسيبه على الدكة لحد الدقيقة 85 وتنزله بعد ما السنغال تسجل يبقى لازم نقف ونقول إنك محتاج خبرات أكتر بكتير عشان تمسك منصب المدير الفني لمنتخب مصر القرارات دي ما تبقاش عناد ولا رد فعل متأخر كان لازم تراجع نفسك وتشوف حسن شحاتة كان بيتعامل إزاي مع لاعيبة تقيلة زي عمرو زكي ومحمد زيدان ويعرف ينزلهم في التوقيت الصح ويكسب الماتش مش بعد ما يضيع إدارة منتخب بحجم مصر مش تجربة ولا مجاملة دي مسؤولية وقرارات في وقتها يا تصيب يا تكلفك الهزيمة 
تتفق مع الكلام ده ولا شايف إن حسام حسن مش لوحده المسؤول عن اللي حصل قدام السنغال
وعلق الكابتن مدحت شلبي يهاجم حسام حسن بالنار بعد خسارة السنغال لما توصل لدقيقة 80 من غير ولا تسديدة على المرمى يبقى لازم نقف ونقول إن حسام حسن يتحمل مسؤولية الهزيمة قدام السنغال مدحت شلبي كان منفعل جدا وقالها من غير لف ولا دوران لما يبقى عندك لاعيبة تقدر تغيّر شكل الماتش زي مصطفى محمد وزيزو وتصر على عدم نزولهم يبقى انت السبب المباشر في الخسارة شلبي كمل وقال انت مش عارف تطلع بالكورة أصلا لحد ما وصلنا لدقيقة 80 من غير تسديدة واحدة على مرمى السنغال دي كارثة مش هجامِل حد على حساب مصر ولو عايزين نكمّل في تصفيات كأس العالم لازم يحصل تغيير
تتفق مع شلبي ولا لأ
تعليق رضا عبد العال “الناري” على عدم مشاركة مصطفى محمد أساسيًا كان يركز على أن تأخير نزوله كان خطأ فادحًا، خاصة في ظل حاجة الفريق للضغط الهجومي، وأن وجوده مع صلاح ومرموش كان سيخلق خطورة أكبر ضد دفاعات المنافسين، مشيرًا إلى أن هذه التغييرات كانت مجاملات وأن نزول محمد شحاته أو مصطفى محمد كان يجب أن يكون أولًا.
أيمن يونس يفتح النار على حسام حسن بعد وداع أمم أفريقيا مقعد مصطفى محمد لحد الدقيقة 80 طيب أمال مين كان المفروض يبدأ الماتش يا حسام بعد الهزيمة قدام السنغال بهدف دون رد وخروج مصر من نصف نهائي أمم أفريقيا أيمن يونس انفجر غضب وقال كان لازم ترجع وتشوف حسن شحاتة كان بيتعامل إزاي مع نجومه وخصوصا عمرو زكي وعماد متعب ومحمد زيدان قبل ما تتعامل مع مصطفى محمد بالشكل ده
وقال الكابتن ايمن يونس إزاي منتخب بحجم مصر يفضل لحد الدقيقة 80 من غير ولا تسديدة على المرمى وضغط طول الماتش ومع ذلك ترفض تنزل مصطفى محمد وقالها صريحة المدرب اللي ما يعرفش يفك مباراة كبيرة بيبقى جاب آخره ودي كانت النتيجة وأضاف أنا مش هجامل حد على حساب مصر وبالطريقة دي بلاش نروح كأس العالم ومن غير لف ولا دوران منصب المدير الفني أكبر من حسام حسن
تتفق مع كلام أيمن يونس ولا شايف إن الانتقادات دي قاسية شوية؟
عجبني كلام ابوتريكة لمصطفي محمد بالتحديد من شوية لما قال
اي لاعب كورة مكان مصطفي محمد كان ممكن يعمل مشكلة النهاردة مع حسام حسن عشان من اول البطولة بينزله في اخر دقيقة
والحركة دي احنا كلاعيبة كورة تجيب لينا احباط وبالبلدي كدة تبطلنا كورة
مصطفي نجم الزمالك ومنتخب مصر من قبل البطولة بيتقال عليه ربع محترف مكنش يصح ابداً يكابتن حسام انت مهاجم كبير وعارف قيمة الكلام ده كويس اوي
وعلق الكابتن جمال عبدالحميد زف حسام حسن ع الهوا :
“متجيش تلاعب مصطفى محمد آخر 5 دقايق… وبعدين تطلع تقول معندناش رأس حربة.”
الجملة دي لوحدها كفيلة تفضح كل حاجة.
تفضح التخبط، وتفضح العناد، وتفضح فكرة إن المشكلة مش في اللعيبة… المشكلة في اللي ماسك الدفة.
إزاي عندك رأس حربة محترف، هداف، جاهز، وقاعد على الدكة 85 دقيقة؟
إزاي بتفتكر وجوده بس لما المباراة تكون ماتت؟
وإزاي بعد كل ده تطلع تشتكي وتقول “مفيش رأس حربة”؟
اللي بيعمله حسام حسن مش نقص إمكانيات… ده سوء إدارة.
مش فقر اختيارات… ده إصرار غريب على قرارات غلط.
ومش حظ وحش… ده إهدار متعمد لواحد من أهم أسلحتك.
منتخب مصر مش حقل تجارب،
ومصطفى محمد مش كومبارس يدخل يسلم على الجمهور.
اللي مش عارف يستغل لاعيبته،
ميطلعش يبرر فشله عليهم.
الكلام خلص…
والصورة بقت واضحة أكتر من أي وقت.
تعرضنا للظلم.. أول تعليق لـ حسام حسن بعد هزيمة منتخب مصر من السنغال
تصريحات نارية من حسام حسن تفضح كواليس أمم أفريقيا حسام حسن طلع بتصريحات تاريخية بعد المباراة كشف فيها حاجات كتير بتحصل في تنظيم أمم أفريقيا بالمغرب وقال نفس الكلام اللي سبق وقاله مسؤولين في الجزائر إن في أطراف مش عايزة مصر توصل للنهائي حسام قال إحنا بنلعب في دولة عربية ومع ذلك داخل استاد كامل بيشجع المنتخب المنافس حسيت إني بلعب في السنغال مش في المغرب ولما البطولة كانت عندنا في مصر 2019 كنا بنشجع المغرب والجزائر وكل المنتخبات العربية وده كان من قلبنا وأضاف المصريين كانوا بيشجعوكم في كأس العالم وبيفرحوا لفوزكم وده رد الجميل إنكم تشجعوا المنتخبات اللي بتلعب ضدنا مش بس كده كمان الحكم كان جاي علينا من أول دقيقة إنذار بدري للاعب عندنا وكأنه عارف إن الإنذار ده هيحرمه من النهائي وقالها صريحة كل حاجة في البطولة دي ماشية برة العدالة والحياد وكلنا فاهمين الاتجاه واحد فين والكلام فيه بقى مالوش لازمة
تتفق مع كلام حسام حسن ولا شايف إن التصريحات دي هروب من المسؤولية؟
